Интернетда тушлар таъбири

Жулия Уилер, Би-Би-Сининг Форс Кўрфази бўйича мухбири

Бирлашган Араб Амирликлари ҳукумати махсус интернет саҳифаси очиб, унда тушларни таъбирлаш хизматини таклиф этмоқда.

Ҳукуматнинг Дўбайдаги Авқаф ва Исломий масалалар бўйича бошқармасига кўра, бу билан улар қаллоб туш таъбирчилигига зарба беришмоқчи.

Исломий анъаналарга кўра, Муҳаммад Пайғамбар тушларни уч тоифага ажратган.

Булар Оллохдан келувчи яхши тушлар, Шайтон йўллаган ёмон тушлар ва инсон ҳаётидаги кечмишларни акслантирувчи тушлардир.

Дўбайдаги Авқаф ва Исломий масалалар бошқармасига кўра, Ислом фақат яхши тушларга таъбир беради.

Ёмон туш кўриб уйғонганда эса, чап тарафга қарата уч марта
суф- суф деб, бошқа тарафга ўгирилиб ётиш керак.

Аммо Бирлашган Араб Амирликлари ҳукумати не боис тушларни таъбирловчи махсус саҳифа очган деган савол туғилади.

Воқеа мана бундай кечган. Ҳукуматнинг Авқаф ва Исломий масалалар бўйича бошқармасининг бир ходими радио орқали тушида ханжар кўрган аёл ҳикоясини эшитиб қолади.

Бу радиодастурда эса ҳалиги аёлга қарата, ханжар кўрган бўлсанг, демак яқинларингдан кимдир сенинг касал бўлиб қолишингни тиламокда деб таъбир берилади.

Буни эшитган Авқаф ва Исломий масалалар бошқармаси ходими, тушлар шу тахлит таъбирланаверса, қаллоблик ва сохта фолбинлик урчиб кетади-ку деган фикрга боради.

Кейин эса у ўз раҳбарларига мурожаат қилиб, тушларни яхшиликка йўйадиган, жиддий ва фойдали таъбирлаш хизмати очишни таклиф этади.

Шу асно интернетда махсус саҳифа хам тузадилар.

Хозир эса Суриялик Шайх бу интернет саҳифасига мурожаат қилган одамларнинг тушларини таъбирламоқда.

Тушини айтган кишига бир неча кун ичида таъбири баён қилинган жавоб йўлланади.

Бу саҳифага ҳозир мусулмонлар хам, насроний ва хиндулар ҳам кириб, мурожаат килишаркан.

Туш таъбирини сўрайдиганларнинг кўпчилиги аёллар деб айтилмоқда.

Тушда ханжар кўриш масаласида эса бу интернет саҳифаси кимдир шаънингизга бир ёмон гап айтгандир, лекин бундан хавотирга тушманг, хотирингиз жам бўлсин деб маслаҳат беради.